Cueva la Paré los Cinchos. Semeya: Santi
La Campaña CADE Ubina 2010, coordinada por Francisco del Busto (Pachu, del GE Gorfolí), axuntó como davezu al Interclub Ubina, esti añu con una bayurosa participación d’espeleólogos/es de bien de clubes estremaos: de los asturianos G.E. Gorfolí, L´Esperteyu Cavernícola Espeleo-club, S.E. Hades, A.D. Cuasacas y G.E. Diañu Burlón, y del G.E. Niphargus (Burgos).
Los trabayos centráronse na esploración de la Cueva la Paré los Cinchos, na que s’amiyó perbaxo los 400 m. de fondura con un desendolcu que perpasa’l kilómetru, a la espera de confirmar los datos topográficos. La principal carauterística d’esta impresionante cavidá ye lo escomanao del volume de les sos galeríes, dalgo muncho bien raro nesti macizu y nel restu d’Asturies.
Al empar, esploráronse otres cavidaes prósimes, algamando resultaos positivos y que van seguir nes vinientes campañes.
