Data: 24/04/10.
Hora: 17:30 h. en Tercer Convocatoria
Cola asistencia como representante de la Direición Xeneral de Deportes de la Conseyería de Cultura y Turismu del Principáu d'Asturies de D. MIGUEL ÁNGEL MÉNDEZ PÉREZ, Xefe de l'Área d'Actividaes y Promoción del Deporte, a les 17:30 h. da empiezu la mesma, atendiendo a los puntos del propuestu
ORDE DEL DÍA
1. Intervención alministrativa de la Federación d'Espeleoloxía del Principáu d'Asturies (FESPA), alcordada por Resolución de 29/01/2010 de la Conseyera de Cultura y Turismu del Principáu (BOPA de 16/03/2010).
2. Presentación de la Comisión Xestora de la FESPA, nomada por Alcuerdu de 23/03/2010, del Director Xeneral de Deportes del Principáu.
Toma la palabra D. PABLO SOLARES VILLAR, Presidente de la Comisión Xestora de la Federación d'Espeleoloxía del Principáu d'Asturies por Alcuerdu del Director Xeneral de Deportes del Principáu de fecha 23/03/2010, dando n'estimar l'asistencia de los presentes y presentar a los componentes de la citada Comisión Xestora:
- Pablo Solares Villar (SEB Escar)
- Ignacio Montero García San Miguel (SEB Escar)
- José Luis del Río Fernández (GE Gorfolí)
- Javier Santa Eugenia Morilla (AD L’Esperteyu Cavernícola Speleo-Club)
- Obdulio Moreno Berros (GE Diañu Burlón)
- Alejandro Caldueño García (GE Polifemo)
- Justo García Madrera (AD Cuasacas)
- Xesús Fernando Manteca Fraile (GE Gorfolí)
Estimando coles mesmes la presencia del Xefe de l'Área d'Actividaes y promoción del Deporte de la Dirección Xeneral de Deportes del Principáu d'Asturies, D. MIGUEL ÁNGEL MÉNDEZ PÉREZ, ésti pasa darréu a resumir la situación d'intervención alministrativa na que s'atopa la Federación, solicitando facilítese la transición y reafitando el sofitu de la Direición Xeneral de Deportes del Principáu a la Comisión Xestora nomada.
De siguío, D. PABLO SOLARES VILLAR pasa a resumir el procesu siguíu hasta'l momentu de la intervención alministrativa per parte la Direición Xeneral de Deportes (DGD), reseñar la irregular situación alministrativa na que s'atopaba la Federación: nun se convocaben les perceptives asamblees nin tampoco eleiciones, nun se presentaben nin xustificaben les cuentes añales nin tampoco los presupuestos, etc.; la descrita situación motivó una denuncia que foi presentada per parte de dellos clubes ante la DGD, procediendo los poderes públicos, tres de los trámites oportunos, a intervenir alministrativamente la Federación, alcordando la suspensión cautelar de los sos órganos de gobiernu y el nomamientu d'una Comisión Xestora.
El Presidente d'esta Comisión Xestora tresllada a l'Asamblea la voluntá de la mesma de trabayar pa normalizar la situación federativa, informando de que dende la Comisión foi-y solicitada collaboración a l'anterior Directiva (trespasu de les llaves de los locales, entrega de los llibros oficiales, clausura de la páxina web privada que se caltién en nome de la Federación, etc.) ensin recibir contestación dala, polo que vuelve repitir públicamente dicha solicitú de collaboración, al atopase presente na Asamblea l'antiguu responsable de la Federación, D. Juan José González Suárez.
El Presidente informa a l'Asamblea que la Comisión solicitó a la Federación Española d'Espeleoloxía (FEE) el llistáu de los deportistes federaos n'Asturies, pa dar en convocar esta Asamblea, lo cual fíxose con calter urxente, debíu tantu a la situación federativa como al retrasu per parte de la FEE a la d'apurrir la llista de federaos solicitada.
Informa coles mesmes de que va ser necesariu realizar una auditoría financiera y de xestión de la Federación, antes de convocar l'oportunu procesu electoral tres el que s'espera la normalización de la institución.
El Presidente informa de los cargos qu'ostenten los distintos miembros de la Comisión Xestora:
- Presidente: Pablo Solares Villar
- Vicepresidente: Xesús Fernando Manteca Fraile
- Secretariu: José Luis del Río Fernández
- Tesoreru: Obdulio Moreno Berros
- Documentación y Catálogu: Javier Santa Eugenia Morilla y Justo García Madrera
- Zones de Trabayu:
Picos y Parques Naturales: Ignacio Montero García San Miguel
Resto d'Asturies: Justo García Madrera
- Material Deportivu: Alejandro Caldueño García
El Presidente solicita a los clubes representaos na Asamblea la so colaboracion pa poder faer la transición de la forma más ordenada posible, informando de los nuevos contactos de la Federación: mail, blogue que se quier sía un tablón d'anuncios sobro la xestión alministrativa de la FESPA, telefonos y fax. Aportuna en que ye necesariu pal bon funcionamientu que se facilite la xera a la Comisión, solicitando que los clubes treslladen la información de la que dispongan sobro zones de trabayu, repitiendo la voluntá de xestión dafechu abierta de la FESPA.
Preguntando a los asistentes a l'Asamblea si daquién precisa de dalguna aclaración del procesu en que s'atopa la Federación ensin que naide plantegue custión dala, llevántase la sesión a les 17:48 hores.
Firma: José Luis del Río Fernández
Secretariu de la Comisión Xestora de la Federaciónd'Espeleoloxía del Principáu d'Asturies (FESPA)
Vº.Bº: Pablo Solares Villar
Presidente de la Comisión Xestora de la Federaciónd'Espeleoloxía del Principáu d'Asturies (FESPA)
Acta de l'Asamblea Estraordinaria de la FESPA de 24/04/10.
